Balakəndə “Azərbaycanın dövlət-din modeli: əsas istiqamətlər” mövzusunda ikigünlük regional konfrans işə başlayıb

Press-relizlər / 30.05.2018 / 14:29

Mayın 30-da Balakən rayonunda Dini Qurumlarla İş üzrə Dövlət Komitəsi və Balakən Rayon İcra Hakimiyyətinin birgə təşkilatçılığı ilə “Azərbaycanın dövlət-din modeli: əsas istiqamətlər” mövzusunda ikigünlük regional konfrans öz işinə başlayıb.
Konfransın birinci günündə məktəblərin təlim-tərbiyə işləri üzrə direktor müavinləri, ümumtəhsil məktəblərində çalışan psixoloq və “Həyat bilgisi” fənnini tədris edən müəllimlər iştirak ediblər.
Tədbiri giriş sözü ilə açan Balakən Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini – dini qurumlarla işin təşkilatçısı Fariz Nəcəfov maarifləndirmə tədbirlərinin keçirilməsinin vacibliyini diqqətə çatdırıb. F.Nəcəfov bildirib ki, bu, dini radikalizm və dini ekstremizmlə ideoloji müstəvidə effektiv mübarizənin aparılmasında mühüm rol oynayır.
Daha sonra çıxış edən Dini Qurumlarla İş üzrə Dövlət Komitəsinin sədr müavini Gündüz İsmayılov vurğulayıb ki, respublikamızda dini durum sabitdir, həmçinin dövlət-din münasibətləri yüksək səviyyədə tənzimlənir.
G. İsmayılov deyib ki, hazırda dünyada dini konfessiya və qrupların aktivliyi müşahidə edilməkdədir. Təəssüflə qeyd edilməlidir ki, bəzən bu cür qrupların fəaliyyətlərində və dini inanclarında ekstremizm meyillərinə rast gəlinir. Natiq bəzi ölkələrdə islamofobiya meyillərinin genişlənməsinin və dinlərarası münasibətlərin gərgin müstəviyə keçidinin müşahidə olunduğunu da vurğulayıb. Sədr müavininin sözlərinə görə, gənclərin dini radikalizm və zərərli cərəyanların təsirlərindən qorunması üçün yüksək təhsilə yiyələnmələri vacibdir.
İslamın sülh dini olduğunu diqqətə çatdıran G. İsmayılovun sözlərinə görə, dinimiz yalnız inanc, mənəvi dəyərlər sistemi deyil, fərdlə yanaşı, cəmiyyəti də öz prinsiplərinə uyğun formalaşdırmağı qarşısına məqsəd qoyan və ilahi mahiyyət daşıyan yoldur. Ancaq bu ideologiya bütün digər idarəçilik sistemlərini və siyasi quruluşları rədd etməyə, teokratik dövlət qurmağa çağırmır. Sədr müavini onu da deyib ki, İslama görə başqaları müsəlmanın nə dilindən, nə də əməlindən zərər görməməlidir. Bildirib ki, özünü ləyaqətli müsəlman hesab edən insan Vətəni, dövləti və yaşadığı cəmiyyət qarşısında daşıdığı məsuliyyəti dərk etməli, xalqın milli-mənəvi dəyərlərinə sadiq olmalı və onları qorumağı bacarmalıdır. Natiq, eyni zamanda deyib ki, dinimizin çağdaş və mədəni müsəlman modeli müqəddəs kitabımız Qurani-Kərimə əsaslanır və bütün dövrlər üçün dəyişməz qalır.  
Daha sonra çıxış edən Dini Qurumlarla İş üzrə Dövlət Komitəsinin Dini maarifləndirmə işinin təşkili şöbəsinin müdir müavini Ruslan Əsgərov ölkəmizdə dini ekstremizmə qarşı aparılan mübarizə tədbirlərindən danışıb. Bildirib ki, dini radikalizmlə mübarizədə ilk növbədə onu yaradan səbəbləri müəyyənləşdirmək lazımdır.
Tədbir iştirakçıların suallarının cavablandırılması ilə yekunlaşıb. 


Son baxılan xəbərlər

Multikulturalizmin Azərbaycan modelinə yüksək qiymət verilib

Multikulturalizm
22.11.2016 / 16:54
Ətraflı oxu

Prezident İlham Əliyev:Azərbaycan dövləti və Azərbaycan xalqı öz milli, dini dəyərlərini daim qoruyur

Xəbərlər
16.07.2018 / 17:35
Ətraflı oxu

Yevlaxda “İnsan Hüquqları Aylığı” ilə bağlı tədbir keçirilib

Press-relizlər
30.05.2019 / 14:03
Ətraflı oxu

Saatlıda “İslam həmrəyliyi sülhə və əmin-amanlığa çağırışdır” mövzusunda tədbir keçirilib

Press-relizlər
08.01.2018 / 15:43
Ətraflı oxu

Saray məktəblilərinə “Şəhadət” sənədli filmi nümayiş etdirilib

Press-relizlər
10.01.2018 / 16:31
Ətraflı oxu

ABŞ-ın Beynəlxalq Din Azadlığı Komissiyasının nümayəndələri Dövlət Komitəsində olublar

Press-relizlər
24.02.2020 / 17:29
Ətraflı oxu