Qətərdə “13-cü Doha Dinlərarası Dialoq Konfransı” keçirilib

Press-relizlər / 21.02.2018 / 14:41

20 və 21 fevral tarixlərində Doha Beynəlxalq Dinlərarası Dialoq Mərkəzinin təşkilatçılığı ilə Qətərin paytaxtı Dohada “13-cü Doha Dinlərarası Dialoq Konfransı” keçirilib.  
“Dinlər və İnsan Hüquqları” mövzusuna həsr edilmiş iki günlük konfransda 50 ölkədən 400-ə yaxın dövlət və hökumət nümayəndələri, alimlər, din xadimləri, eyni zamanda, müsəlman və qeyri-müsəlman dini konfessiya rəhbərləri, müxtəlif ölkələrin diplomatik nümayəndələri iştirak ediblər.
Sözügedən konfransda ölkəmizi Dini Qurumlarla İş üzrə Dövlət Komitəsinin Xarici əlaqələr şöbəsinin müdir müavini Rəfi Qurbanov, Bakı Dövlət Universitetinin İlahiyyat fakültəsinin baş müəllimi, İlahiyyət üzrə fəlsəfə doktoru Aqil Şirinov, ADA Universitetinin müəllimi, dinşünas alim Nəriman Qasımoğlu və “Həyat Sözü” Xristian dini icmasının sədri Rasim Xəlilov təmsil ediblər.
Tədbiri giriş sözü ilə açan Qətər Dövlətinin Xarici İşlər naziri Sultan İbn Saad bildirib ki, konfrans dünyada dinlər və mədəniyyətlərin parçalanaraq birgəyaşayış ənənələrinin məhvinə zəmin yaratdığı, münaqişə və qeyri-sabitliyin hökm sürdüyü bir dövrdə öz mahiyyətinə görə mühüm əhəmiyyət kəsb edir. Daha sonra Qətər Dövlətinin bu sahədə gördüyü işlərə toxunan nazir konfransın işinə və iştirakçılara uğurlar arzulayıb.
Daha sonra konfrans “Dini etiqad azadlığı və dini ayinlər”, “Fərdi hüquqlar və dövlət marağı”, “Siyasi, iqtisadi və sosial hüquqlar”, “İnsan hüquqlarının pozulmasına dair dinlərin mövqeyi”, “Terrorizm və ekstremizmə dini baxış”, “Dini tolerantlıq və dini dözümsüzlükdən imtina”, “Fərdi və qrup hüquqlarının pozulması”, “İlahi qanunlar və Beynəlxalq Konvensiyalar arasında insan hüquqları məsələsi”nə həsr edilmiş panel müzakirələr ilə öz işini davam etdirib.
“Ekstremizm və terrorizmə dini baxış” mövzusunda keçirilən paneldə “Dini dözümsüzlüyün əsas səbəbləri” mövzusunda çıxış edən Bakı Dövlət Universitetinin, İlahiyyat fakültəsinin baş müəllimi, İlahiyyət üzrə fəlsəfə doktoru Aqil Şirinov Azərbaycanda mövcud olan dini tolerantlıq mühitinə toxunaraq bildirib ki, ölkə ərazisində yaşayan müxtəlif dinlərin nümayəndələri arasında qarşılıqlı hörmət, dialoq və tolerantlıq mövcuddur. Dövlət-din münasibətlərinin yüksək səviyyədə təmin olunmasından danışan Aqil Şirinov ölkə Prezidenti cənab İlham Əliyev tərəfindən 2016-cı ilin Azərbaycan Respublikasında “Multikulturalizm ili” və 2017-ci ilin “İslam Həmrəyliyi İli” elan edilməsini konfrans iştirakçılarının diqqətinə çatdırıb.
Çıxışının sonunda Dağlıq-Qarabağ, Azərbaycan-Ermənistan münaqişəsinə toxunan A.Şirinov qeyd edib ki, Azərbaycanın 20 faiz torpağı erməni silahlı qüvvələri tərəfindən işğal edilib, işğal edilmiş ərazilərdə tarixən mövcud olan tarixi-dini abidələrimiz, məscidlərimiz dağıdılıb.
Digər çıxışlardan sonra konfransın nəticəsinə dair Bəyannamə imzalanıb və “13-cü Doha Dinlərarası Dialoq Konfransı” öz işini başa çatdırıb.

 


Son baxılan xəbərlər

“Gənclərin dini radikalizmdən qorunması: hüquqi və mənəvi yanaşma” mövzusunda tədbir keçirilib

Press-relizlər
17.04.2019 / 15:43
Ətraflı oxu

Azərbaycanda dövlət-din modeli xalqımızın milli maraqlarına yönəlib

Press-relizlər
20.02.2018 / 17:32
Ətraflı oxu

Zaqatalada “Azərbaycan gəncliyi: dünən, bu gün, sabah” mövzusunda tədbir keçirilib

Press-relizlər
02.04.2019 / 17:41
Ətraflı oxu

Dini Qurumlarla İş üzrə Dövlət Komitəsinin sədri Mübariz Qurbanlı Fransada jurnalistlərin öldürülməsi hadisəsinə ...

Açıqlama
08.01.2015 / 15:00
Ətraflı oxu

“Azərbaycanın dövlət-din modeli: dünyəvilik” mövzusundakı regional konfrans öz işini davam etdirib

Xəbərlər
18.02.2020 / 16:40
Ətraflı oxu

Şəkidə “Müasir çağırışlar: dini durum və vəzifələr” mövzusunda regional konfrans keçirilib

Press-relizlər
25.06.2019 / 16:59
Ətraflı oxu