Dövlət Komitəsinin sədri Əfqanıstanın Azərbaycandakı səfiri ilə görüşüb

Press-relizlər / 14.02.2018 / 14:59

Dini Qurumlarla İş üzrə Dövlət Komitəsinin sədri Mübariz Qurbanlı fevralın 14-də Əfqanıstanın Azərbaycandakı səfiri Məhəmməd Tağı Xəlili ilə görüşüb.
Qonağı səmimiyyətlə salamlayan Dövlət Komitəsinin sədri Mübariz Qurbanlı Azərbaycan və Əfqanıstan arasındakı əlaqələrdən söz açaraq ikitərəfli münasibətlərin yüksək səviyyədə olduğunu bildirib.
Daha sonra Dövlət Komitəsinin sədri rəhbərlik etdiyi qurumun vəzifələri və fəaliyyət istiqamətləri, ölkəmizdəki sabit dini durum barədə qonağı məlumatlandırıb.
O, Azərbaycanda tarixi-mədəni irsin dirçəldilməsinə, xüsusən də dini ibadətgahların əsaslı təmiri və yenidən qurulmasına diqqət yetirildiyini vurğulayıb. Eyni zamanda, İslam və qeyri-islam dini icmalarının fəaliyyətinə münbit imkanlar açılması, mütəmadi olaraq maliyyə vəsaitləri ayrılması da diqqətə çatdırılıb.
Mübariz Qurbanlı dövlətin din siyasətinin mühüm tərkib hissəsinin xalqımızın milli-mənəvi dəyərlərinin, mədəniyyətlərarası dialoqun, tolerantlıq ənənələrinin daha da inkişaf etdirilməsi, İslam dininin sülhsevər ideyalarının təbliği olduğunu qeyd edib. Bunların təzahürü olaraq, 2017-ci ilin Azərbaycanda Prezident İlham Əliyev tərəfindən “İslam Həmrəyliyi İli” elan edildiyini deyib. İlin yekunlarına həsr edilmiş beynəlxalq konfransda bu istiqamətdəki fəaliyyətin növbəti ildə davam etdirilməsi barədə qərar qəbul olunduğunu söyləyib.
Hər iki xalqı mədəniyyət, tarix və dini baxımdan birləşdirən bir çox məqamların olduğunu bildirən Məhəmməd Tağı Xəlili qarşılıqlı münasibətlərin inkişafından məmnunluğunu ifadə edib.
Diplomat Əfqanıstanın Ermənistan-Azərbaycan, Dağlıq Qarabağ münaqişəsinin həllində Azərbaycanın haqlı mövqeyini hər zaman dəstəklədiyini bildirib. Səfir ölkəmizdəki mövcud tolerant dəyərləri, dinlərarası harmoniyanı nümunəvi örnək kimi dəyərləndirib. Ötən il Bakıda keçirilən “2017-İslam Həmrəyliyi İli: Dinlər və mədəniyyətlərarası dialoq” mövzusundakı beynəlxalq konfransda Əfqanıstanın Həcc və islam işləri nazirinin iştirak etdiyini və ölkəmizdən yüksək təəssüratla ayrıldığını deyib. O, bu yaxınlarda Prezident İlham Əliyevin Sərəncamı ilə yaradılan Azərbaycan İlahiyyat İnstitutunu yüksək dini-mənəvi mühitin qorunub saxlanılması, yüksək ixtisaslı kadrların hazırlanması baxımından mühüm imkan kimi qiymətləndirib. Yaxın gələcəkdə institutun imkanlarından yararlanmaqda maraqlı olduqlarını vurğulayıb.
Görüş zamanı iki ölkənin müvafiq qurumları arasında əməkdaşlıq çərçivəsində birgə tədbirlərin, konfransların keçirilməsi ilə bağlı fikir mübadiləsi aparılıb.

 


Son baxılan xəbərlər

Dini icma sədrləri və din xadimlərinin iştirakı ilə videokonfrans keçirilib

Press-relizlər
12.06.2020 / 11:59
Ətraflı oxu

“Narkomanlığa qarşı mübarizədə dini icmaların və din xadimlərinin rolu” mövzusunda tədbir keçirilib

Press-relizlər
28.02.2020 / 17:42
Ətraflı oxu

DQİDK-nın əməkdaşı Sinqapurda keçirilən beynəlxalq tədbirdə iştirak edib

Press-relizlər
25.07.2016 / 16:33
Ətraflı oxu

“Şəhadət” sənədli filmi Xətai məktəbində nümayiş etdirilib

Press-relizlər
13.11.2017 / 16:05
Ətraflı oxu

Qubada maarifləndirmə tədbiri baş tutub

Press-relizlər
11.01.2018 / 16:52
Ətraflı oxu

Balakəndə “Aprel döyüşləri - vətənpərvərlik nümunəsi” mövzusunda tədbir keçirilib

Press-relizlər
14.04.2018 / 13:30
Ətraflı oxu